三九天灸三貼定四貼？綜合套餐包咩、早鳥優惠幾時截止、長者醫療券可唔可以用

四貼一組係點計？

三九天灸一組四貼：初九、二九、三九各一貼，加一貼加強灸。每個九有五日可選，唔使揀死一日。頭三年建議每季（三伏、三九）都做齊四貼，因為天灸嘅設計係三年為一個完整階段，連續跟足效果一般較理想；做滿三年之後，可以按醫師建議揀三貼。體質偏弱、鼻敏感發作頻密嘅人，就算做滿三年，醫師多數仍會建議四貼。

基礎定綜合？

• 基礎治療：淨係貼敷，分四貼同三貼兩款。適合體質唔算太虛、主要想做季節保養嘅人。
• 綜合治療：貼敷加內服中藥顆粒——四貼配 12 天、三貼配 9 天。分四貼同三貼兩款，價錢見天灸專頁。中藥顆粒由醫師按你體質開，每日沖水飲，同貼灸嘅溫陽方向配合。

邊類人建議綜合？三伏冇做、今年係第一次；鼻敏感或者咳嗽發作頻密；怕凍手腳冰冷明顯；長期易攰、胃口差、大便稀——即係體質偏虛較深，淨靠貼敷，身體未必有足夠嘅基礎去接藥力，加內服調理會穩陣啲。醫師問診嗰陣會俾建議，唔會夾硬推綜合。

2026–27 三九日期

• 初九：12 月 20 至 24 日（正日 12 月 22 日冬至）
• 二九：12 月 30、31 日，1 月 2 至 4 日（跳過元旦；正日 12 月 31 日）
• 三九：1 月 8 至 12 日（正日 1 月 9 日）
• 加強灸：1 月 17 至 21 日

每個九有五日，揀其中一日就得，三間分店都做；報名時同姑娘講定邊間、邊日。各分店星期六、日應診時間唔同，12 月 25、26 日同 1 月 1 日公眾假期休息。

早鳥優惠點計

12 月 1 日前報名並付款，每個套餐都有早鳥減價，各套餐正價同早鳥價見天灸專頁。優惠至 11 月 30 日止，以付款日計，唔係以報名日計——即係 11 月報咗名但 12 月先付款，就唔計早鳥。

12 月 1 日起改為二人同行優惠：兩位一齊報名，兩位都有減價，金額見天灸專頁。早鳥同二人同行按日期分開，唔會同時用。

長者醫療券可唔可以用？

可以。沙田、馬鞍山、土瓜灣三間分店都接受長者醫療券，65 歲或以上帶身份證嚟就得，天灸套餐、診金、中藥、針灸都可以用券支付。點用、每年額度同常見問題，可以睇長者醫療券專頁。長者做天灸要留意皮膚薄、貼敷時間會縮短，醫師會按情況交代。

點登記？點改期？

三九天灸而家接受預先登記：經 WhatsApp 或者電話留名（天灸唔設網上自助落單），登記時唔使付款，揀定分店同每個九嘅日子，姑娘會再聯絡你確認時段；想先由醫師評估係咪適合，可以先網上預約診症。臨時有事或者病咗，同姑娘講一聲改另一日就可以——發燒、感冒急性期當日唔貼，延後幾日唔會影響成組。

常見問題

三伏冇做，三九可唔可以直接開始？

可以。三伏同三九各自成組，由邊個開始都得；第一次做嘅人建議揀綜合套餐，或者三九前先做四至六星期內服調理。

一家人可唔可以一齊報？

可以一齊登記，每人一個套餐，各自揀日子；小朋友（一般 3 歲以上）同長者嘅貼敷時間會分開交代。

中藥顆粒點食？食唔晒點算？

一般每日兩次，每次一包沖溫水飲，跟醫師交代嘅日數；如果食嗰陣有唔舒服，停一停同姑娘講，唔好夾硬食晒。

貼咗之後點護理？起水泡點算？

撕走藥餅後隔兩小時先沖涼，當日戒生冷辛辣海鮮，貼位發紅係正常，細水泡唔好刺穿。詳細可睇天灸貼後護理。

完整日期、套餐同登記方法，可瀏覽天灸療程頁面；邊啲人適合、邊啲人唔適合可睇天灸適合邊個；三間分店均由註冊中醫師駐診，歡迎 WhatsApp 姑娘或者網上預約。